Абай атындағы жалпы орта мектепте «Білім саласын цифрландыру – дамудың озық үлгісі» тақырыбында ата-аналар конференциясы ұйымдастырылды.
Оның аясында «Үйірменің үйретері көп» айдарымен конференцияға келген ата-аналарға оқушылардың үйірме жұмыстарынан көрме ұйымдастырылды. Ата-аналар жас өрендердің қолөнер бағытындағы шығармашылығымен танысса, дойбы және шахмат үйірмесінің қатысушылары тартысты ойын өрнегін көрсетті.
Заман талабына сай мектепте жаңадан қолға алынған робототехника үйірмесінің білім алушылары жаңа техниканы қалай меңгергендіктері туралы ой бөліссе, кітапханадағы коворкинг орталығының жұмысы да көпшілікке таныстырылды. «Өнерлінің өрісі кең» атты музыка пәнінің мұғалімі М.Бахышовтың жетекшілігімен оқушылардың шағын концерті ұйымдастырылды.
Үштілділікке баулуда қуыршақ және ағылшын үйірмелерінің балғындары ертегілерден көрініс қойды.Балалардың шығармашылық қабілеттерін арттыру, бейнелеу өнеріне деген қызығушылығын ояту мақсатында құрылған сурет үйірмесінің қатысушылары өздерінің әдемі туындыларын көпшілікке таныстырды.
Конференцияда ата-аналар кеңесінің төрағасы Еркебұлан Тұрланұлы күн тәртібіндегі мәселелерден хабардар етті. Мектеп мұғалімдері оқытудың жаңа бағдарламасына сай «Күнделік кз», электрондық оқулықтарды онлайн режимде қолдану туралы тың ақпараттармен бөлісті. Сонымен қатар, оқушылардың ішкі тәртіп ережесін, қауіпсіздік шараларын, мектеп формасын қатаң сақтау, үйде смартфон мен ғаламторды тиімді пайдалану қажеттігі ескертілді. Мектеп директоры Тілекші Медеуғалиева конференцияны қорытындылап, ата-аналарды мектеппен белсенді жұмыс жасауға шақырды.
А.Шакупова